JPM ajiandikisha Chamwino, atoa neno kuhusu kuhamia Dodoma

Imewekwa tarehe: October 12th, 2019

Rais wa Jamhuri ya Muungano wa Tanzania, Mhe. Dkt. John Pombe Magufuli na Mkewe Mama Janeth Magufuli leo tarehe 12 Oktoba,2019 wamejiandikisha katika Daftari la Orodha ya Wapiga kura katika Kituo cha Sokoine kilichopo katika Wilaya ya Chamwino mkoani Dodoma kwa ajili ya Uchaguzi wa Serikali za Mitaa utakaofanyika tarehe 24 Novemba, 2019.

Baada ya kujiandikisha Rais Magufuli amesalimiana na wananchi wa Chamwino waliokuwa wamejitokeza kujiandikisha katika kituo hicho na kuwaeleza kuwa pamoja na kwamba miundombinu ya Ikulu bado haijakamilika yeye ameshahamia Dodoma.

"Mimi nilikuwa Katavi, nimeamua kuja kujiandikisha rasmi hapa, kwa hiyo kila siku tutakuwa tunaonana hapa, ndio maana nimeona nije nijiandikishe mimi pamoja na mke wangu" amesema Rais Magufuli.

Rais amewataka Watanzania kuendelea kujitokeza katika vituo vya kujiandikisha vilivyopo nchi nzima ili tarehe 24 Novemba, 2019 waweze kutumia haki yao ya kikatiba ya kuwachagua viongozi wa Serikali za Mitaa watakaowaona wanafaa.

Aidha, Rais Magufuli amewapongeza Waandishi wa Habari wa Mkoa wa Dodoma waliofika katika kituo hicho kwa kutekeleza majukumu  yao ya uandishi wa habari na amewasisitiza kuendelea kutimiza majukumu hayo kwa weledi na kwa kutanguliza maslahi ya Taifa.

Baadae, Rais Magufuli aliwaalika waandishi hao na kula nao chakula cha mchana, nyumbani kwake katika Ikulu ya Chamwino.

Mke wa Rais Mama Janeth Magufuli akijiandikisha katika Daftari la Wapiga kura katika Kituo cha Sokoine Chamwino kwa ajili ya Uchaguzi wa Serikali za Mitaa utakaofanyika 24 Novemba, 2019.

Rais Dkt. John Magufuli akiongea na wananchi wa Kitongoji cha Sokoine Wilayani Chamwino mara baada ya kujiandikisha katika Daftari la Wapiga kura leo.

Rais Dkt. John Magufuli baada ya kujiandikisha na kisha kuongea na wananchi wa Kitongozi cha Sokoine, aliwaalika waandishi wa habari waliohudhuria uandikishaji kula naye chakula cha mchana pamoja ambapo aliwapongeza kwa kazi nzuri wanayoifanya, na kuwahimiza kuendelea kufanya kazi zao kwa weledi.