Dodona Jiji yaipiga Ruvu na kutinga tano bora

Imewekwa tarehe: March 26th, 2021

TIMU ya Dodoma Jiji FC imeendeleza ubabe kunako Ligi Kuu ya Vodacom Tanzania Bara kwa kuichapa Ruvu Shooting magoli 2 – 0 katika uwanja wake wa nyumbani na kujinyakulia pointi tatu, magoli yakifungwa na Dickson Ambundo dakika ya 33, huku goli la pili likifungwa na Peter Mapunda mnamo dakika ya 71 ya mchezo huo.

Ushindi huo wa Dodoma Jiji unaifanya timu hiyo kupanda kutoka nafasi ya 7 mpaka nafasi ya 5 katika msimamo wa Ligi hiyo ikiwa imecheza michezo 22 na kufikisha pointi 32.

Akizungumza baada ya mchezo huo kocha Mkuu wa timu hiyo Mbwana Makata amesema kuwa wamefika katika eneo ambalo lilikua ndio shabaha yao na wana kazi ya kufanya kama timu kuhakikisha wanasalia ndani ya tano bora mpaka kumalizika kwa msimu huu wa 2020/2021.

“Kama timu malengo yetu ya awali yalikua tumalize Ligi ndani ya kumi bora lakini tumevuka malengo na tumeingia kwenye tano bora, hili ni kama deni kwetu na tuna kazi ya kufanya kama timu kuhakikisha hatutoki katika eneo hili mpaka kumalizika kwa msimu huu” Alisema Makata.

Aidha timu hiyo yenye makazi yake Jijini Dodoma itaondoka kesho Mkoani Pwani kuelekea Jijini Mbeya kuwakabili Mbeya City siku ya jumatatu tarehe 08.03.2021 katika dimba la Sokoine.